Est 6 | KYG | STEP | Ani hani'ilagamo kini vekamo au kalesiyafe'mo havae'niya'monanafa au okaleno afa'a mai'neno'ae'mo agai'amo yagaino ne'apateya kote'mo afole ai'niya kavafe'mo ava gemo avo'mo kae'a ne'malaya mukue'mo mago vekae'mo, alinika eno, huno ha pai'nigeno alinino eno kini vekamo aulagale'mo ani mukufi'mo lekana pai'niye.

Esther 6

Kini vekamo'a Motekai'mo ala agi'amo ami'niya gemae

1 Ani hani'ilagamo kini vekamo au kalesiyafe'mo havae'niya'monanafa au okaleno afa'a mai'neno'ae'mo agai'amo yagaino ne'apateya kote'mo afole ai'niya kavafe'mo ava gemo avo'mo kae'a ne'malaya mukue'mo mago vekae'mo, alinika eno, huno ha pai'nigeno alinino eno kini vekamo aulagale'mo ani mukufi'mo lekana pai'niye. 2 Inagi lole vekala'mo Mikitana'e Telesi'e'mo kini vekamo lafi kate kipate'mo hogote'ana ne'yagai'a vekala'ani anava gemo hane'nigeno lekana pai'niye. Ani lole vekala'moganimo kini vekamo amagisa'ageno falisiya kafe'mo kahauya neha'ageno'ae'mo Motekai'a ani hisa'a kavafe'mo anava gemo afiteno'ae'mo eno kini vekae'mo ha pai'niya anava gemo lekana pai'nigeno kini vekamo'a ani gemo afi'niye. 3 Afiteno'ae'mo, Ani alagepa kava'alefe'mo haiya agufa kava'mo hu'a Motekai'mo ala agi'amo ami'nae, huno apafi ge'nige'apae'mo kini vekamo ali'ya'amo ne'aliya vaya'mogi, Agaetefe'mo mago kava'mo osu'nae, hu'a ha pai'nae.

4 Inagi kini vekamo'a, Hemenimo ina la'mo no'mo lafi kegi'yafi'mo mai'niye, huno apafi ge'niye. Hemani'a ani afina'mo alo hu male'niya yosale'mo Motekai'mo ane'mu aeno asaisiyafe'mo kini vekae'mo afi gesiyafe'mo haine'niye. 5 Kini vekamo ali'ya'amo ne'aliya vaya'mogimo agete'apae'mo, Hemani'a kagaemo kagesiyafe'mo ago eno kagava mai'niye, hu'a ha pai'nageno kini vekamo'a, avalelitapa haiteyo, huno hapa pai'niye. 6 Inagi Hemani'a faleno haine'nigeno'ae'mo kini vekamo'a, Afiyo, huno, mago vekamo mai'niyanage'na nagaemo ala agimo ali'na amiguva'monanafa nagaemo agaetegamo na agufa alagepa kava'mo huguve, huno afi ge'nigeno'ae'mo Hemani'a aipafi'mo agesamo afino'ae'mo, kini vekamo'a ani kava'mo ina lategamo hisiyafe'mo ani gemo hu'niye. Mago vaya'mo o'mai'nafa nagaeke'mo mai'nove, huno agesamo afi'niye. 7 Inagi Hemani'a kini vekamo ge'ale'mo aeno atagaina huno ha paino'ae'mo, Kini vekae, ala agi'amo alisiya vekalegamo ina kava'mo huvo. Kini vekamogamo yatala lokiya kukenamo alika ne'vaina kukena alige hosimo fai ne'maina hosimo agenopale'mo kini kakolitagana agufa ya'mo ali'a male'a ate'naya hosimo avalege huli'a egae. 9 Kagae nofi vayapati'mo mago hogote vekae'mo ge hugeno'ao ani vekamo'a kukenakafati'mo mago alino vaino ateteno hosile'mo avaleno faino ateno. Ani vekamo hosile'mo haino fai mai'nisigeno ani hogote vekamo'a taonifi'mo vaya'mo ali'a anupa hu'a ne'maiya yate'mo avalelino vino. Ani lole vekala'mo ne'u'anae'mo kagae nofi vekamo'mo ge huno'ae'mo, Mani vekamo ageyo, huno, kini vekamo'a amuse huno ateteno ala agi'amo amisiyafe'mo hau'nisiya vekalegamo ani agufa kava'mo hugiye, huno ge hugiye. 10 Kini vekamo'a ani gemo afiteno'ae'mo Hemanife'mo ina ge huno ha pai'niye. Malage huka uka kukena'nimo alige hosi'nimo avalege hulika eka Yu vekamo Motekaitegamo kagaemo naha pai'nana agufa kava'mo huvo. Agaemo kini vekamo lafi kegi'ya kate kipate'mo itopale'mo mai'negaiye. Muki naha pai'nana gemo akame huka agaetegamo ani agufa kava'mo huvo, huno ha pai'niye. 11 Hemani'a kini vekamo ge'amo akame huno uno kukena alige hosi avalege hulineno Motekai'mo vaino ateteno Motekai'a hosile'mo haino fai mai'nigeno Hemani'a taonifi'mo ali'a anupa hu'a ne'maiya yate'mo avalelino u'niye. Anakaemo ne'u'anae'mo Hemani'a alopa gefati'mo ge huno hapa pai'niye. Ageyo, huno, kini vekamo'a ala agi'amo amisiyafe'mo hau'nisiya vekalegamo mani agufa kava'mo hugiye, huno hapa pai'niye.

12 Henaga'amo Motekai'a halate aino atagineno kini vekamo lafi kegi'ya kate kipate'mo u'niya'monanafa Hemani'a agenopale'mo lavolavoleti'mo aino ati kaelineno yulagefa aime aime no'alegamo atagineno nagu nagu huno u'niye. 13 Uno'ae'mo a'amo Selesi'e muki ao vaya'efe'mo agaetegamo muki afole ai'niya kavafe'mo ava ge huno hapa pai'nige'apae'mo a'a'e muki ao vaya'mo agete'a afi'naya vaya'mogi'e'mo, Motekai'a alagi kame huno kate'niyanageka alagi aepa fai'nanageka alagi asagauka aisanafe'mo hane. Yu nofi vekamo mai'niya'mofe'mo kagaemo alagi aeka o'agasegananageka alagike'mo asagauka aigane, hu'a ha pai'nae. 14 Ani gemo nehage'apae'mo kini vekamo ali'ya'amo ne'aliya vaya'mogimo Hemani'mo avaleli'a Esata'a alopa yagita hu male'niyategamo visayafe'mo malage hu'a u'nae.